1Th 2 | PWG | STEP | Varevaresikai, koakovi da akii numataya kurimi na ere iyamna.

a 2:2Apos 16:19-24, 17:1-9

b 2:14Apos 17:5

c 2:15Apos 9:23, 29, 13:45, 50, 14:2, 5, 19, 17:5, 13, 18:12

1 Thessalonians 2

Pol Tesalonika kamonai ibiga.

1 Varevaresikai, koakovi da akii numataya kurimi na ere iyamna. 2 Ma koakovi da Pilipai kamonai wawaya ivi agaberowekai na kavokwarakwara ma kavi kamyuyuwa. Ma nani murinai kapisi kurimi. Namanaki da wawaya ivi tupaketowanekai ma kavi kamyuyuwa, ma kegha da ita God rewapana iverekai da varana biibiina kadimadimei kurimi. ^a 3 Ma kavi nowi kurimi da koti tumaghana ma nani kamonai ke sago nota berona gavugavuna, ke kati sisiya bero ma ke kati beroberowemi. 4 Kegha da God ivi tumaghanekai ma ivi vaghinei da varana biibiina kata dimei. Ke wawaya i kayowana kata dimadimei ma God ina kayowana kava, tuna nuwanuwata eruvaruvai. 5 Ma koakovi da ke meyani kati beroberowemi da nuwanuwami kata tinavirai ma bade ke meyani ami mura kata matighei. God iakovi da kavonavona vaghata. 6 Ma ke vigheghena katekwekwai, tami gwabimiyai bo wawaya viya gwabisiyai. Tokai Keriso ina aposol ma kovokovoghina da kati nowi kurimi da vita kata veremi, ma ke kata berai. 7 Kamomiyai nuwanubiiyai kamakai, nakanani ma maduwa natunatuna gisigisisi ita raparapisi. 8 Akii nuwaviina kurimi na irakata kirakai, tuna kubiine nuwabiibiiyai tavi nuwasago ma God varana kavi debei kurimi, iyamna kakova bubunimi ma tami na nuwanuwakai. 9 Varevaresikai, konotanotai da gwabimiyai kabiga kirakai, mariyai ma didibarai. Tokai kakoyagha meyekai, ke kata kayowei da kati nowi kurimi maranai God varana biibiina kadimadimei kurimi.

10 Vitumaghana dami kamomiyai kamakamakai na tami matamiyai ma God matanai akii bera peyarina kurimi na vovokaravina ma maninina, berona kegha. 11 Koakovi ikikava kaberai tami sago sago duma kurimi, nakanani ma tomowa natunatuna ita koyakoyaghisi. 12 Kakiikiiepepimi da ami nota ini rewapana, ami nuwapoya kavi nubai, ma sisiya bagibagisi kavereveremi da Keresiyana ita keta kona kivina bubuni da God ini nuwabiibiiyemi. Tuna ikwatumi da ina vikiivavona ma kana kadara ku kamona kona rui.

13 Mara nonowa God kaikiikiiwei iyamna varana biibiina kovi yanei ma kovi tumaghanei da sisiyina ke wawaya gwabisiyai ita pisi, ma God gwabinai ipisi. Tuna vonavaghata, God vonana inekiibau kurimi da tami vitumaghana wawayimi ami yawasa eviravirai. 14 Varevaresikai, aviyavisina itupuwa kurimi na namada itupuwa God ina wawaya Judiya kamonai kurisi. Keriso kovi tumaghanei kubiine, ami wawaya ivi tupaketowanemi da kovi kamyuyuwa. ^b 15 Ikikava ivi tupaketowanemi na bade nakanani Jiu damsi Bada Yesu ma peroperoveta kurisi iberai, ivi rabobosi ma bade tokai ikwavinikai. Nani damsi mara nonowa wawaya yavata ikawapata. Ti nakanani eberaberai da God nuwanuwana ipughu. ^c 16 Ma ita gudukai, ke ita kayokayowei da kupuna damsi kurisi kata dima da yawasa makamakii nonowina ita panani. Weni berasi iberai na i berabero ivi kiitatanei. Ma karako God nuwanuwana ighetawei da kovogha ina veresi.

Pol Tesalonika damsi ita kita meyesi.

17 Ma varevaresikai, tavi bogebogeta (tupuwita kava tavi bogebogeta ma nuwanuwata na kegha). Mara tupona ke kata kitakitimi ma akii nota kudubinai kaberabera tovoni da kata kita meyemi. 18 Kakayokayowei da kata pisi kurimi, vonavaghata taku Pol mara ipeyari abera tovoni, ma Seitan akii keta igudugudui. 19 Mara sago ita Bada Yesu Keriso ina vovira ku dobu. Ma akii nota rewapaninai katumatuma da tuna maranai tami tepamiyai akii nuwabiibai ma kakii vava ina rakata. Vonavaghata, tami tepamiyai. ^{▼▼2:19Pol ivonavona da ibera bubuna da Tesalonika damsi ivi tumaghana ma ti nakanani ma ina kraun.} 20 Kakii kadara ma akii nuwabiibai na tami.